Беларуская мова як нацыянальна-культурны феномен: рэпрэзентацыя ў лінгвакультуралагічным слоўніку

Abstrakt

У даследаванні прадстаўлены слоўнікавыя артыкулы падрыхтаванага аўтарам дадзенай працы да друку выдання “Краіна Беларусь: Лінгвакультуралагічны слоўнік”, у якіх беларуская мова выступае як нацыянальнакультурны феномен. Мэта даследавання – абгрунтаваць неабходнасць уключэння ў рэестр лінгвакультуралагічнага слоўніка артыкулаў, прысвечаных апісанню асаблівасцяў беларускай мовы. Слоўнік павінен стаць не проста лінгвістычным выданнем, а таксама сродкам адлюстравання і спасціжэння культуры грамадства, яго нацыянальнай унікальнасці, накіраваным на прадстаўленне чытачу інфармацыі пра адметнасці беларускай мовы і культуры. Задача стваральніка слоўніка заключаецца ў тым, каб адлюстраваць мову, якая з’яўляецца выразнікам той культуры, у якой яна існуе.